प्राचीन काळापासून मानवी संस्कृतीत ग्रंथालयांना फार महत्व आहे. ग्रंथालय म्हणजे ज्ञानाचे भांडार. विविध विषयात माणसाने केलेली प्रगती व मिळविलेले ज्ञान यांचा एकत्र संचय ग्रंथालयात पहावयास मिळतो. या ग्रंथालयांची व्यवस्था पाहणारा ग्रंथपाल आवश्यक तो संदर्भग्रंथ देऊन प्रत्येक वाचकाची जिज्ञासा पूर्ण करतो. त्याला ग्रंथालयातील सर्व ज्ञानभांडाराची माहिती असते. सध्याच्या माहितीतंत्रज्ञानयुगात ग्रंथालयांचे महत्व अधिकच वाढले आहे. पुस्तकांशिवाय इतर अनेक नवीन माध्यमे ग्रंथकाराला हाताळावी लागतात. ग्रंथालयांना भरपूर अर्थसाहाय्य मिळत असले तरी ग्रंथपालाकडे बहुधा दुर्लक्षच केले जाते. या ग्रंथपालांना आधुनिक साधनांचा वापर सातत्याने करता यावा, त्यांचे संघटन व्हावे या दृष्टीकोनातून ही वेबसाईट तयार करण्यात आली आहे.
ग्रंथपाल हा सतत पुस्तकांच्या संपर्कात असल्याने ते ते विषय व त्या अनुषंगाने उपलब्ध असणारी पुस्तके याचे समीकरण त्याचा मनात सतत मांडलेले असते. विविधविषयांवरील नवीजुनी पुस्तके, मासिके, वार्तापत्रे, ध्वनिफीती, चित्रफीती यांची आकर्षक पद्धतीने मांडणी करून तो वाचकाला सर्व प्रकारची माहती पुरविण्यात सदैव तत्पर असतो. अशा ग्रंथपालांना एकमेकांची माहिती व्हावी, त्यांच्या माहितीची देवाणघेवाण करता यावी या हेतूने ही साईट तयार करण्यात आली आहे. यात ग्रंथपालाची स्वत:ची माहिती, फोटो घालण्याची सोय केलेली आहे. जगभरातील सर्व ग्रंथपालांच्या माहितीसोबत वेगवेगळया प्रकाशनसंस्था, प्रकाशक यांचाही संग्रह वा साईटमध्ये केलेला आहे.
No comments:
Post a Comment