🍚 भूमितीच्या स्वप्ननगरीत अनुषा – भाग २

 🍚 भूमितीच्या स्वप्ननगरीत अनुषा – भाग २

रात्रीच्या जेवणात आईने अनुषाच्या आवडीचा भाज्यांचा फ्राईड राईस केला होता. भातातल्या हिरव्या शेंगदाण्यांकडे पाहताना अनुषाला तिच्या स्वप्नातले पॉइंट मुलं आठवले. तिला वाटलं, हे शेंगदाणे लपाछपी खेळतायत!

तिने चमच्याने त्यांना रांगेत लावायला सुरुवात केली, जणू ते पॉइंट मुलं आहेत. आईने भुवया उंचावल्या, “अनुषा, अन्नाशी खेळ नको. जेव लवकर.”

अनुषाने काही न बोलता भात संपवला—पण मनात ती स्वतःला एक मोठ्ठा राक्षस समजून भात गिळत होती! नंतर ती झोपायला गेली… पण झोप काही येईना. तिचं मन त्या जादुई शाळेत अडकून पडलं होतं.

आणि पाहता पाहता, ती पुन्हा त्या शाळेत पोहोचली!

या वेळी बाई म्हणाल्या, “अनुषा, आज तू मोठ्या वर्गाला शिकव. सगळ्या मुली आहेत—पण फार आळशी!”

अनुषा वर्गात गेली. तिथे सडपातळ मुली सगळीकडे आडव्या पडल्या होत्या. तिने एका मुलीला विचारलं, “तुझं नाव काय?”

“माझं नाव लाईन,” ती म्हणाली.

दुसरीही तेच म्हणाली. सगळ्यांचं नाव पुन्हा एकच!

अनुषाने त्यांना उभं राहायला सांगितलं. तिला लक्षात आलं की सगळ्यांची उंची वेगवेगळी आहे.

 मग तिने त्यांना उंचीनुसार रांगेत लावलं—सर्वात ठेंगणी ते सर्वात उंच. आणि नावं दिली—Line1, Line2, Line3…

बाई हळूच म्हणाल्या, “या गणिताच्या जादुई शाळेत अनेक वर्ग आहेत. चल, दाखवते कशी तयार होतात ही मुले.”

त्या अनुषाला एका कारखान्यात घेऊन गेल्या. एक मशीन मोठे ब्लॉक्स फोडून छोटे कण बनवत होतं—हे म्हणजे पॉइंट मुलं. दुसरं मशीन पॉइंट्स रांगेत लावत होतं—त्यातून तयार होत होत्या लाईन मुली. तिसरं मशीन त्या लाईन्स एकत्र चिकटवून त्रिकोण, चौकोन वगैरे आकृती बनवत होतं.

अनुषा भारावून गेली. तिने ठरवलं—दररोज रात्री ती एक नवीन वर्ग पाहायला येणार!